ماتريال الترجمة

غريبة حمص

كاس ونص فرينة حمص

شطر كاس فرينة

كاس غير ربع سكر فرينة 

كاس غير ربع زبدة 

وزيد ازيت قد ما يلزم 

لازمه تتعجن حتى تشد في بعضها واطيب في فور هادي 15-20 دقيقة 

ثورة الكرامة والعدالة، ولا ثورة رقاص المنقالة

أفكار ستيفن ستروكاتز عن المزامنة

http://www.ted.com/index.php/talks/steven_strogatz_on_sync.html

نشيخو على التزامن، نشطحو على نفس الخطوة ونغنيو على نفس النغمة، ونعملوا ثورة مبعضنا زادة.

شنوا لازم بش نتفاهمو على وقت الثورة و شنصيحو في نفس الوقت؟

يمكن ما لازمنا شي ملي يقولو فيه من وعي وذكى وما تابعهم.

الحيوانات يمشو في قطيع منظم. يهاجروا في مجموعة في نفس الوقت. حتى جماد كيما رمل الصحرا ينظم روحو بروحو في كثبان مرصفة على نفس البعد ونفس الطول!

يان كوزان، باحث في أكسفورد، كتب نموذج رقمي لحوت يعوم في مجموعة. بش يوصل لنفس التصرف متع الحوت في الطبيعة، حط تلاثة قوانين: 

- كل فرد في بالو بألي بجنبو 

- كل فرد مذابيه يتصفف- كل فرد يحب يقرب لفرد أخر أما ما يلسقوش

كي تحط القوانين هاذم، تشوف نفس التصرف متع الحيوانات في قطيع. يضهرلك إلي كل فرد يلوج بش يخلي القطيع متماسك أما في الحقيقة كل فرد يعمل إلي في مخو. كي يتبعو نفس القوانين كاينهم يخمو بإسم المجموعة. يتبعوا القوانين هاذم بش يمنعوا بجلدهم و يخدم مصلحتهم. وقتلي تلقاهم في مجموعة ويجي خطر، موجات متع الخوف تتعدى في القطيع. المعلومة فيسع ما توصل للقطيع الكل. 

والحكاية هذي تلقاها حتى في حاجات ماهيش كائنات حية كيما الخلية متع قلب. ماهيش كائن حي أما بش تخدم القلب لازمها تخدم في نفس الوقت مع الخلايا متع القلب الكل. وما فماش حاجة تنظمهم. إلي يخلي القلب يدق موش خالية تشد الاقاع. فما ديمقراطية متع 10000 خلية يخدموا في نفس الوقت. 

نجمو نعملوا تجربة متع حاجة جماد تتزامن. مثلا تاخو زوز رقاصات مناقل. كان تحطهم بعاد على بعضهم عمرهم ما يتزامنو خاطر ما يحكيوش مع بعظهم. يقول القايل كيفاش رقاص منقال يحكي؟ ينجمو يحكيو بدزان، كان يأثروا على بعضهم بأي طريقة. مثلاً كان جاو فوق منصة تتحرك. معناتها وقتلي يرقصو ينجمو يحركها وكي حركها رقاص يأثر على الرقاص لاخر. كان تعمل التجربة، تلقاهم يتزامنو ويوليو يرقصو مبعضهم. 

التوانسة كيف كيف. كانوا كيما رقاص المنقالة على الأرض. ما فماش منصة تتحرك بش يأثروا على الرقاص إلي بجنبو. ولا المنصة ما تفوتش قهوة الحومة. كي جى الفايسبوك، المنصة ولات توصل لبعيد وخاطر في تونس الناس الكل تزيد في بعضها، ولات منصة وطنية! وبعد البوعزيزي بدا الرقص في سيدي بوزيد والمعلومة تعدات بسرعة في المجموعة إلي بدات تتزامن. السرعة إلي تعدات بها المجموعة فاقت حتى السرعة متع رد الفعل متع وزارة الداخلية، وهكا صارت الثورة التونسية !

ارقصوا، غنوا، ثورة !! ثورة !! 

بديت نكتب بعد ما قريت هالنص إلي يحكي فيه سي مستحس على الفرق مابين أحدث الحوض في 2008 وأحداث ديسمبر 2010. نص وعليه الكلام !

http://ektebbettounsi.blogspot.com/2011/09/blog-post_17.html

يقول إلي الفرق لولا قمع متع مجموعة والثانية قمع متع شخص. زادة صنف التونسي المقهور و التونسي العياش. وقال التونسي العياش شاف روحو في البوعزيزي. حبيت نجاوب ك واحد مغروب بالمنظمات المعقدة وخاصةً بالديناميات الغير خطية والفوضى. 

أنا نتصور إلي الفرق ما بين 2008 و-2010 إلي الجميع ولاو يحكيو مع بعضهم و- يأثروا على بعضهم، ولى فما تفاعل مبين التونسي المقهور والتونسي العياش مثلاً. معناتها زادت المنظومة في التفاعل ما بين المذبذبات (رقاصة المناقل) اللاخطية وهكك وصلو للتزامن. فما برشة بحوث في نظرية الموذبذبات اللاخطية المتفاعلة و نظرية الفوضى. اللاخطية في المنظومة هذي جاية من المبالغة والتنبير. معناتها التنبير يرد رد الفعل مش على قد الإضطراب إلي متسبب فيه، فما مبالغة في تبليغ المعلومة. هذا يخلي خضار يحرق روحو في سيدي بوزيد يتسبب في زوبعة في شارع حبيب بورقيبة. ولا في روايةٍ أخرى، بائع متجول يسقط نظام التحول.

حكاية نيتشية باللغة التونسية

نيتشة - على التحولات التلاثة - كتاب "هكا قال زردشت"
ترجمها وريقللها أمورها ياسين.

 تلاثة تحولات متع الروح، نفرز: كيفاش الروح تولي جمل، والجمل صيد، والصيد فلخر طفل.

برشة حاجات ثقيلة على الروح، الروح القوية إلي هازة الحمل وإلي الخشوع ساكنها: في الثقيل ولي أثقل تلقى قوتها.

شنوا الثقيل؟ تقول هالروح إلي تحمل؛ وبعد تركع كي الجمل، تحب تكون معبية حمل.

شنيا أثقل حاجة، يا ابطال؟  تقول هالروح، شنيا أثقل حاجة نجم نهزها وانا عاملة جو على قوتي.

أهيشي هذي: يذلل الواحد روحو بش يحشم مفخرتو؟ يسيب بهامتو بش يتمنيك على ذكاه؟

ولا هذي: ننساو القضية وقتلي يجي الوقت بش نفرحو بانتصارها؟ نطلعو جبال عالية بش نطلعو فتنة في مولى الفتن؟

ولا هذي: نشبعو بغلة وحشيش المعرفة، وفي جرة لحقيقة نذوقو جوع الروح ؟

ولا هذي: واحد مريض ويرفض الإعانة، يصوحب الطرش إلي عمرهم ما يسمعوا شحاشتو؟   

ولا هذي: تهبط في ماء جيفة،ماء الحقيقة، وما يهمك لا في جرذان باردة لا في أفاعي حية؟ 

ولا هذي: نحبو الي يحقرنا، ونمدو يدنا للشبح إلي نهار آخر يخوفنا؟

أثقل الحاجاة هاذي تنجم تتحملها الروح الصابرة، وكيما الجمل المحمل بالسلعة، تتوغل في الغابة. 

أما في أفرغ بلاصة في الغابة يصير ما يصير: لهنا الروح تولي صيد؛ بش تفك الحرية، وتولي بكلمتها في غابتها.

لهنا تلوج في آخر حاكم مازال يحكم فيها: كان تشدو ادقدقوا، حتى لآخر حاجة تحكم فيها؛  في جرة الإنتصار،تتعارك حتى مع أكبر وحش.

شنوا هالوحش الكبير إلي الروح ماعادش تحب تعيطلو سيدي؟ 'لازم عليك' طليعة هالوحش. أما روح الصيد تقول، "خلي عليك." 'لازم عليك' متعرضلها في طريقها، حيوان مغطس في الذهب، وفي كل شبر من جلدو  مكتوب، "لازم عليك!"

القيم متع ألف سنة لتالي تلمع على جلدو، أعظم الوحوش تكلم. "القيم متع كل شي يلمعو على جلدي. القيم الكل تخلقو، وكل شي خلق قيم، هاذيكا كلمتي." قال الوحش، "تنساها هذي 'خلي عليك'."

يا جماعة، شحاشتنا بالصيد في الروح ؟ ما تكفيش روح الجمل، مطبصة راسها وتتحمل؟ 

لازم تخلق قيم جديدة إلي حتى الصيد ما ينجمش يخلقها.أما بش تصنع لروحها الحرية بش تبدع، حاشتها بالوهرة متع الصيد. بش تصنع لروحها الحرية ، وتقول لا حتى للواجب: علاكا، يا جماعة، حاشتنا بالصيد. تنجم تتصور إلي عندها الحق في قيم جديدة، أذاكا شتنجم تعمل الروح إلي تهز الحمل أما عمرها ما تطالبش بحقها. الحيوان الوحشي يصطاد في أرواح كيما هكا.

أكثر حاجة مقدسة عندها، كلمة "لازم عليا": توا لازمها تلقى الوهم والتعسف حتى في أقدس الحاجات، بش تفك الحرية من حبها: الصيد نحتاجولو لهالفكان. 

أما يقول القايل، يا جماعة، شينجم يعمل الطفل، إلي حتى الصيد ما ينجموش؟ علاش لازم الصيد الصياد يولي طفل زغير؟ 

براءة الطفل الزغير، تسامحو، طرح جديد، والدولاب يدور، مالضربة لولا، لازم 'نعم' مقدسة. 

إيه، خاطر لعبة الخلق، يا جماعة، لازمها شكون يقول "إيه نعم": توا الروح هي إلي تقرر؛ عالمها هو العالم.

 تلاثة تحولات متع الروح، فرزت: كيفاش الروح تولي جمل، والجمل صيد، والصيد فلخر طفل.

هكا قال زردشت. ووقتها سكن في دشرة يقولولها بير البقر.

نيتشة - ترجمها وبرقشها ياسين. 

حكاية و تفدليكة على إنتخابات تونسية في أماريكا

20 أكتوبر
أول منتخبة متحجبه ولابسة دجين محزوق و ما تحكيش بالعربي. خذات ورقة الإقتراع، ومعرفتش انهوا الحزب إلي تحب عليه. سألتنا بل انجليز انهوا الحزب الإسلامي. أنيس قاللها منجموش نقولولك لانو حزب تصوت. وقاللها إلي فما أكثر من ليستة عندها الأفكار هاذم. قالت إنجمشي نستعمل لابتوب نلوج عليه. حكينا مبعضنا وقلنا ميسالش. لوجت شوية وبعد انتخبت وخرجت. اتفقنا إلي أخر مرة نعملوها لحكاية هذي، ما يجيش. خرجت م البيرو وقعدت قدام الباب تحكي في التليفون مدة وللحكاية بقية.
بعد جاو جماعة من ساوث بيتش. أنيس قال ممكن من ما يعرف بجماعة الفوياج أركانيزي متع 2000 (جاو مع جامعة
زوز فواياجات متع يجي 40 كل واحد ! وكلهم قعدوا) والله أعلم. ناس باهين. واحد منهم شادد في التكتل وما التكتل ويفدلك قلك جماعة النهضة اهمك قاعدين في الصالة.
بعد جاو جماعة تامبا. معاهم شاكالا (معروف غادي) عملت فيديو معاهم وقالولي طل علينا في تامبا وأسأل على شاكالا. قالك كلها تاكسيست في تامبا وفما بارشا حجاما توانسة.
بعد جاو زوز من سوسة يقراو في جامعة اف آي يو (مايامي). باهين وقيتهم كي حتجتلهم في ترجيع الكرهبة اللوكاسيون إلي جيت بيها من كانزفل.
بعد جا سيد (إتضح إلي هو بو أك الطفلة إلي جات أول وحدة) وجات منبعدو مجموعة. تعبا البيرو وولت زحمة زغيرة وأحنا ما عناش عضو يشدهم لبرا.عدا أك السيد يدكزدر وقتلي قتلوا صحح قالي ما يعرفش يكتب ياخي قتلوا مالا تبصم. مشا بلحط صبعو بالحبار الإنتخابي وخذا ورقة الإقتراع. وسألنا على شيعمل كي ما يعرش يقرى. قلنلو اهمكا التصاور. قال إلي هو يفدلك وخرج لوناتو وتخل للخلوة. و في الزحمة، ما سألتوش على تليفونو. قعد مدة مش عادية وأنيس قالي سمعوا سكر تليفونو. خرج وصوت وسأل إذا كان ينجم ياخو دليل الإقتراع وكفاش يعرف إلي العملية ميش مدلسة. فسرنلو إلي الدليل فيه معلومات حساسة وفيه تعليمات دقيقة تضمن شفافية العملية الإنتخابية ! سألني شنعمل، قتلوا نصرة كيميكل انجينيرينغ. لاخي كشخ وقال لا، مش حاجة، لازمك الطب هو اللازم، سألتوا شيعمل، قالي عندو دكتورا في الرياضيات أما ميش عاجبتو ...
جاو جماعة أخرى من ساوث بيتش أما ما نستحذرهمش مليح. بعد جاء واحد وحدو من ساوث بيتش. قال يخدم يجاري طرف رستورنات. خذا كيران بش يجي. تصور وهوا يحط في الورقة في الصندوق وشادد البسبور قائلا 'أول مرة الواحد يتشرف بيه'
بعدو جات مرا ميش متحجبة جابت زوز نسا متحجبين وراجل. ساقت من اورلاندو. تحكي ياسر وصادمة علينا تقول دارها. قالتلنا إلي هي شدت البيرو هاذا في الإنتخابات الفارطة. وزادت إلي جاو بحذاها الجماعة خاطر مرت خوها (ووالد السيد) بش تولد. وهي جايبتهم خاطر الواجب الإنتخابي. تسأل على الليستات وطلبت بش تشوف ورقة التصويت شافتها قدام أنيس وعيطة للمرا (مرت السيد) وقلتلها هذا الحزب إلي نحبو عليه ووراتها النهضة. أنيس فكلها الورقة وخرجناهم الكل. وبدينا نعيطو بالواحد بالواحد. الراجل ومرى المتحجبة لخرى قال قيدو في تونس أما جاتهم حالة إستثنائية .
جى واحد من بوكا راتون عندو لحية متع أستاذ جامعي إنتخب وروح. ووقتلي قريب إنسكرو جات طفلة تعرف السكرتير متع القنصل الشرفي. قالت صوتت للقطب ولا حاجة كيفو. كي كملت شيعناها فعولا تخو تكسي. تعمل في ستاج في ميامي في شركة متع تلفزة و تقرا في باريز.



21 أكتوبر
ليوم جى رمزي معانا. رمزي بحبوح ويحكي مع لعباد أكثر. زادة لعباد إلي جات حبوا يحكيو أكثر وفما إلي قعدوا
جو تلاثة يعملوا في البيلوتاج في دايتونا بيتش.
جى زادة تقريب في نفس القاعة سفيان عزيز ومرتو امال عندو حانوت حوايج في ميامي بيتش. إنتخب وقعد مع جماعة دايتون بيتش في الصالة
جى واحد من تامبا. انتخبوا الجميع وسفيان يخرج ويقول هاني راجع. بعد شوية رجع ببرشة ماكلة ولا عنا بوفي كامل وقازوز وبنكنا طرف حكينا وعنينا على البيرو.
حكينا عل قذافي وعلى القوات الأجنبية ودورها في ليبيا. سفيان قال إلي كملولو فلوسو وبعد تركوه لثوار.
جى طارق دوهش. هذا سكن في سويسرا وكان عندو بار في بلاد زغيرة والبار هذا جاب دفيرسيتي للبلاد. قلك ما خلسش كرى وعمل باتسيون بش ما كسرش البنية. خاطرها بوسطة قديمة، قللهم ناخذها ونخدم فيها بلاش وكان الأمر كذلك.
الحادثة البارزة ليوم: جات مرى قات تلاثة رجال قدام المكتب دخلط وضهرت مرتبكة شوية صوتت وخرجت. هي خارجة وواحد من الرجال سألها لشكون صوتت، قالت للقطب وسألتو ونتي؟ قاللها للنهضة. قتلوا يوز يور مايند. لاخي تخل وقلي درا شبيها المدام تنبزت ودرا شقالتلي. قتلوا شقلتلها قالي سألتها بنية لشكون صوت. احنا نحكيو وهي رجعت. وقتلي نجمش ناخو حاجة تثبت إلي أنا صوت للقطب.. قلتلها ما يجيش، الإنتخابات سرية وما نعفرش كل واحد لشكون صوت. وعبرت على خوفها من تدليس خاطر مشا في بالها الجماعة تابعين هيئة الإنتخابات. لاخي فسرتلها الاجراءت وأنيس طمنها. قالت فهمتكم وشكراً ومشات. كي مشات فسرت للسيد إلي كي سأله إنتهك حريتها الشخصية. وبعد شوية روحوا لتامبا.

22 أكتوبر
نهار تعدى فيسع جو برشة توانسة (94) وصار برشة حديث لبرا من البيرو وأنا الداخل نقيد في المنتخبين ما نجمتش نسمع كل شي وندمت إلي ما كنتش البرى ...
جى واحد يعيتولو بورقيبة وهو تشهر في الفايسبوك وقتلي خرج ينظف في شارع حبيب بورقيبة. قالي رمزي قلقوه في تونس خطرو مسيحي ياخي جى لاماريكا. هذا قام فصباح في اتلانتا والكرهبة ما خدمتلوش. ياخي قص تسكرت طيارة وجاء بالذمة. لبس دربوا تونس على كتافو وغنى مع الجماعة النشيد الوطني قدام البيرو ! زادة ندمت إلي ما كنتش معاهم لبرا !!
جو برشة من اورلاندو وتامبا وفما إرتباط واضح ما بين لحية والجيان من تامبا. جاو زوز لوواجات من تامبا. لمو بعضهم وكراوهم.
جاو شوية ما عندهمش بطاقة تعريف ولا باسبور وما قبلناهمش. واحد يسكن بعيد 25 دقيقة يتذمر كفاش بش يمشي ويرجع بش يجيب البسبور وما رجعش.
وواحد أخر قريب بش يبكي خاطر أوراقو في سايف في بانكة ونهار السبت مسكرة. عندو نسخ وبرمي فلوريدا. قعد يحكيلنا على صحابو ماتوا في يديه ويتوسل فينا بش نخليوه ينتخب إحتراماً ليهم. القانون واضح، منجموش نخليوه. أما إقترحنا عليه بش يقعد ك مراقب ويحضر عمليات الفرز.
نهرتها م الصباح جى واحد مراقب مستقل من اورلاندو وقعد معنا تقريب إنهار الكل. جاب عيلتو ومرتو جابت باتي وياغورت يعطيها الصحة. بعد جا واحد ممثل قائمة حزب النهضة وقعد معانا شطر النهار. في العشية، قللنا المستقل هاني ماشي. قلنلو تي أقعد تصور مع لعروسة. قاللنا ميسالش هاو السيد معاكم على ممثل القايمة. ولازم نذكر إلي طول المدة إلي مبعضهم وهما يحكيو. أنا بدي قعد معاهم مدة ألي ما جاء فيها حد نحكيو لبرى من المكتب على شوية سياسة وغير سياسة. عندهم تفكير واضح وينجمو يشدو معاك في الحديث النظري مغير ما يزلقو ياسر. الحديث دار على دور السلطة في تحقيق مصالح الأغلبية و من الشيرة لخرى إحترام مبادئ الأقلية. قال إلي مصالح الأغلبية لازمه تاخو الأولوية على مصالح الأقلية مش كما كان الأقلية (عايلة بن علي) تحتكر المصالح. قتلوا زادة إلي هذا ما لزمش يكون على حساب حرية الأقلية. قالي كي تبدا عندك الأغلبية تسكن في الشمال وأقلية في الشرق، ما يجيش تعمل كياس كبير يهز للشرق. لازم كياس كبير يهز للشمال وكياس تتوفر فيه مستلزمات التنقل الكريم يهز للشرق .. تي حصيلو، نقاش بناء لباس بيه ... حكيت معاه كما نحكي مع الي يعملو في العلوم السياسية من صحابي.
وفاة الإنتخابات وجاء وقت الفرز، صلى المراقب وواحد ناخب المغرب وبدينا عملية الفرز. حلين الصندوق بعد لا قيدنا المعطيات اللازمة و حضرنا المحاضر ألي بش نعمروهم، قلبنا الصندوق على طاولة وحطينا ال-151 ورقة على قفاها وبدينا. أنا مسيت الورقة لولا والمراقب م النهضة قالي سمي بسمله !! سميت بسبله، وبديت: خمسطاش، النهضة، خمسطاش، النهضة، خمسطاش، النهضة، خمسطاش، النهضة، خمسطاش، النهضة، عشرة، المؤتمر، خمسطاش، النهضة، عشرة، المؤتمر، خمسطاش، النهضة، ستة، التكتل، خمسطاش، النهضة، خمسطاش، النهضة، عشرة، المؤتمر، أثناش، القطب، أثناش، القطب خمسطاش، النهضة، خمسطاش، النهضة، خمسطاش، النهضة، خمسطاش، النهضة، عشرة، المؤتمر.... تي حصيلو فهمتوها، فما شكون سألني شكون جاب أكثر أصوات، قتلها ماك جيت وريت اللحي ..
قيدنا ما قيدنا، سكرنا الصندوق ومشينا تعشينة وعملنا شيشة في ميامي المناضلة.
حكاللنا صاحبنا على كفاش التوانسة في مايامي إلي يعرفهم م الجامع يعاون بعضهم ويخدموا بعضهم. يلموا فلوس بش يبنيو جوامع وعندهم زوز حاجات اخرين يركزوا عليهم لازم نعاود نسأل عليهم. قاللنا بدا يمشي مع واحد يعرفوا وبعد بطل. قالك برشة أمريكان يصليو على كراسي ويتكستيو (يبعثوا في ميساجات) وقتلي الناس الكل تصلي. هاذا خبر غير مؤكد و ما عليا كان البلاغ!


شكراً على المتابعة وكيما قال المذيع في موزاييك لبارح، جازاكم الله خيراً !

تشخشيم تحفون في ثورة البو قرعون

أيا قالك يا سيدي شعب تونس تحرر و سماولو هالتحرير ثورة الياسمين. ممكن بش يمنعوا السياحة؛ شبيك ومضة إشهارية عالمية !

أي عادة قلت كي ولا عطيان الراي مسيب وقولان الشي معادش عيب، نقترح تسميت هالثورة ثورة البوقرعون.

أي شبيه، نوارة مزينة، فيها الألوان الوطنية، وفي الإسم موجودة "بو" بش ديمة نتذكرو سيدي بو زيد المناضلة!!

ومش كان هكك، زيد البو قرعون يعملوا بيه الخشخاش. إيه نعم. مالا علاش اشعب التونسي الكلو مخشخش في بعضو وموش فاهم شي. فاش قاعد يصير؟ وشنوا الي صار ؟؟ وشبي الناس الكل تبدلت ؟؟ وتلافز ؟؟ والفيسبوك، شبيه ولا هكك ؟؟؟ عادي الناس تبرتاجي في حكايات كبيرة وتحكي فلي ما يتحكاش؟؟ تو عادي الي صاير !!!

هاو نقلكم: الناس مشخشمة، والثورة ثورة البو قرعون، وتحيا تونس حرة و شايخة !!

نظرت زوبعة الفنية في تجربة بروليتارية أمريكانية

موش علفلوس، أما تجربة في مطعم كانت من أقوى التجارب الأمريكانية على خاطر

- أول مرة نخدم برسمي. بون، ماكانتش غريبة برشة من الناحية هاذي. أما كانت تجربة مفيدة ك خدمة

الخدامة الكل تقول يملكو المحل. الكلهم يحكيو بالجمع. مثلاً، "وفاولنا الفراشط" ولا "مرسي عليك إلي عاونتنا الليلة". و إلي يلقى حاجة ماهيش ماشية كيما يلزم،يريكلها مغير ما يتشوكع لحد. بون، الرستورانت هاذا سبيسيال خاطر نعرف شكون يخدم فيه و زادة لوكال (مهوش شان متع رستورونات) و كلاس شوية

المفعول متع خدمة مفيهاش برشة تخمام يخليك تخمل في برشة أفكار ونتي تخدم. بعد التجربة هاذي، عرفت علاش فما برشة مؤلفين بروليتاريين. بعد الخدمة قيت في مخي قعباجي متع أفكار.

المحرك متع أمريكا هما لعباد هاذم. يخدمو إنهار الكل خاطر لازمهم يخلصو الكريديات و يشريو الحاجات المتوفرة !! إيه نعم هذي لازم نحكي عليها فالمستقبل؛ جودة الحياة إلي تتقاس بالحاجات المتوفرة في الحوانيت ماهيش جودة، بالعكس، عذاب، خاطر تولي لازمك تخدم أكثر بش تشري هل حاجات

!ك ملخص، التجربة كانت أحسن تجربة عشتها وأكثر تجربة فهمت بها العالم