حكاية و تفدليكة على إنتخابات تونسية في أماريكا

20 أكتوبر
أول منتخبة متحجبه ولابسة دجين محزوق و ما تحكيش بالعربي. خذات ورقة الإقتراع، ومعرفتش انهوا الحزب إلي تحب عليه. سألتنا بل انجليز انهوا الحزب الإسلامي. أنيس قاللها منجموش نقولولك لانو حزب تصوت. وقاللها إلي فما أكثر من ليستة عندها الأفكار هاذم. قالت إنجمشي نستعمل لابتوب نلوج عليه. حكينا مبعضنا وقلنا ميسالش. لوجت شوية وبعد انتخبت وخرجت. اتفقنا إلي أخر مرة نعملوها لحكاية هذي، ما يجيش. خرجت م البيرو وقعدت قدام الباب تحكي في التليفون مدة وللحكاية بقية.
بعد جاو جماعة من ساوث بيتش. أنيس قال ممكن من ما يعرف بجماعة الفوياج أركانيزي متع 2000 (جاو مع جامعة
زوز فواياجات متع يجي 40 كل واحد ! وكلهم قعدوا) والله أعلم. ناس باهين. واحد منهم شادد في التكتل وما التكتل ويفدلك قلك جماعة النهضة اهمك قاعدين في الصالة.
بعد جاو جماعة تامبا. معاهم شاكالا (معروف غادي) عملت فيديو معاهم وقالولي طل علينا في تامبا وأسأل على شاكالا. قالك كلها تاكسيست في تامبا وفما بارشا حجاما توانسة.
بعد جاو زوز من سوسة يقراو في جامعة اف آي يو (مايامي). باهين وقيتهم كي حتجتلهم في ترجيع الكرهبة اللوكاسيون إلي جيت بيها من كانزفل.
بعد جا سيد (إتضح إلي هو بو أك الطفلة إلي جات أول وحدة) وجات منبعدو مجموعة. تعبا البيرو وولت زحمة زغيرة وأحنا ما عناش عضو يشدهم لبرا.عدا أك السيد يدكزدر وقتلي قتلوا صحح قالي ما يعرفش يكتب ياخي قتلوا مالا تبصم. مشا بلحط صبعو بالحبار الإنتخابي وخذا ورقة الإقتراع. وسألنا على شيعمل كي ما يعرش يقرى. قلنلو اهمكا التصاور. قال إلي هو يفدلك وخرج لوناتو وتخل للخلوة. و في الزحمة، ما سألتوش على تليفونو. قعد مدة مش عادية وأنيس قالي سمعوا سكر تليفونو. خرج وصوت وسأل إذا كان ينجم ياخو دليل الإقتراع وكفاش يعرف إلي العملية ميش مدلسة. فسرنلو إلي الدليل فيه معلومات حساسة وفيه تعليمات دقيقة تضمن شفافية العملية الإنتخابية ! سألني شنعمل، قتلوا نصرة كيميكل انجينيرينغ. لاخي كشخ وقال لا، مش حاجة، لازمك الطب هو اللازم، سألتوا شيعمل، قالي عندو دكتورا في الرياضيات أما ميش عاجبتو ...
جاو جماعة أخرى من ساوث بيتش أما ما نستحذرهمش مليح. بعد جاء واحد وحدو من ساوث بيتش. قال يخدم يجاري طرف رستورنات. خذا كيران بش يجي. تصور وهوا يحط في الورقة في الصندوق وشادد البسبور قائلا 'أول مرة الواحد يتشرف بيه'
بعدو جات مرا ميش متحجبة جابت زوز نسا متحجبين وراجل. ساقت من اورلاندو. تحكي ياسر وصادمة علينا تقول دارها. قالتلنا إلي هي شدت البيرو هاذا في الإنتخابات الفارطة. وزادت إلي جاو بحذاها الجماعة خاطر مرت خوها (ووالد السيد) بش تولد. وهي جايبتهم خاطر الواجب الإنتخابي. تسأل على الليستات وطلبت بش تشوف ورقة التصويت شافتها قدام أنيس وعيطة للمرا (مرت السيد) وقلتلها هذا الحزب إلي نحبو عليه ووراتها النهضة. أنيس فكلها الورقة وخرجناهم الكل. وبدينا نعيطو بالواحد بالواحد. الراجل ومرى المتحجبة لخرى قال قيدو في تونس أما جاتهم حالة إستثنائية .
جى واحد من بوكا راتون عندو لحية متع أستاذ جامعي إنتخب وروح. ووقتلي قريب إنسكرو جات طفلة تعرف السكرتير متع القنصل الشرفي. قالت صوتت للقطب ولا حاجة كيفو. كي كملت شيعناها فعولا تخو تكسي. تعمل في ستاج في ميامي في شركة متع تلفزة و تقرا في باريز.



21 أكتوبر
ليوم جى رمزي معانا. رمزي بحبوح ويحكي مع لعباد أكثر. زادة لعباد إلي جات حبوا يحكيو أكثر وفما إلي قعدوا
جو تلاثة يعملوا في البيلوتاج في دايتونا بيتش.
جى زادة تقريب في نفس القاعة سفيان عزيز ومرتو امال عندو حانوت حوايج في ميامي بيتش. إنتخب وقعد مع جماعة دايتون بيتش في الصالة
جى واحد من تامبا. انتخبوا الجميع وسفيان يخرج ويقول هاني راجع. بعد شوية رجع ببرشة ماكلة ولا عنا بوفي كامل وقازوز وبنكنا طرف حكينا وعنينا على البيرو.
حكينا عل قذافي وعلى القوات الأجنبية ودورها في ليبيا. سفيان قال إلي كملولو فلوسو وبعد تركوه لثوار.
جى طارق دوهش. هذا سكن في سويسرا وكان عندو بار في بلاد زغيرة والبار هذا جاب دفيرسيتي للبلاد. قلك ما خلسش كرى وعمل باتسيون بش ما كسرش البنية. خاطرها بوسطة قديمة، قللهم ناخذها ونخدم فيها بلاش وكان الأمر كذلك.
الحادثة البارزة ليوم: جات مرى قات تلاثة رجال قدام المكتب دخلط وضهرت مرتبكة شوية صوتت وخرجت. هي خارجة وواحد من الرجال سألها لشكون صوتت، قالت للقطب وسألتو ونتي؟ قاللها للنهضة. قتلوا يوز يور مايند. لاخي تخل وقلي درا شبيها المدام تنبزت ودرا شقالتلي. قتلوا شقلتلها قالي سألتها بنية لشكون صوت. احنا نحكيو وهي رجعت. وقتلي نجمش ناخو حاجة تثبت إلي أنا صوت للقطب.. قلتلها ما يجيش، الإنتخابات سرية وما نعفرش كل واحد لشكون صوت. وعبرت على خوفها من تدليس خاطر مشا في بالها الجماعة تابعين هيئة الإنتخابات. لاخي فسرتلها الاجراءت وأنيس طمنها. قالت فهمتكم وشكراً ومشات. كي مشات فسرت للسيد إلي كي سأله إنتهك حريتها الشخصية. وبعد شوية روحوا لتامبا.

22 أكتوبر
نهار تعدى فيسع جو برشة توانسة (94) وصار برشة حديث لبرا من البيرو وأنا الداخل نقيد في المنتخبين ما نجمتش نسمع كل شي وندمت إلي ما كنتش البرى ...
جى واحد يعيتولو بورقيبة وهو تشهر في الفايسبوك وقتلي خرج ينظف في شارع حبيب بورقيبة. قالي رمزي قلقوه في تونس خطرو مسيحي ياخي جى لاماريكا. هذا قام فصباح في اتلانتا والكرهبة ما خدمتلوش. ياخي قص تسكرت طيارة وجاء بالذمة. لبس دربوا تونس على كتافو وغنى مع الجماعة النشيد الوطني قدام البيرو ! زادة ندمت إلي ما كنتش معاهم لبرا !!
جو برشة من اورلاندو وتامبا وفما إرتباط واضح ما بين لحية والجيان من تامبا. جاو زوز لوواجات من تامبا. لمو بعضهم وكراوهم.
جاو شوية ما عندهمش بطاقة تعريف ولا باسبور وما قبلناهمش. واحد يسكن بعيد 25 دقيقة يتذمر كفاش بش يمشي ويرجع بش يجيب البسبور وما رجعش.
وواحد أخر قريب بش يبكي خاطر أوراقو في سايف في بانكة ونهار السبت مسكرة. عندو نسخ وبرمي فلوريدا. قعد يحكيلنا على صحابو ماتوا في يديه ويتوسل فينا بش نخليوه ينتخب إحتراماً ليهم. القانون واضح، منجموش نخليوه. أما إقترحنا عليه بش يقعد ك مراقب ويحضر عمليات الفرز.
نهرتها م الصباح جى واحد مراقب مستقل من اورلاندو وقعد معنا تقريب إنهار الكل. جاب عيلتو ومرتو جابت باتي وياغورت يعطيها الصحة. بعد جا واحد ممثل قائمة حزب النهضة وقعد معانا شطر النهار. في العشية، قللنا المستقل هاني ماشي. قلنلو تي أقعد تصور مع لعروسة. قاللنا ميسالش هاو السيد معاكم على ممثل القايمة. ولازم نذكر إلي طول المدة إلي مبعضهم وهما يحكيو. أنا بدي قعد معاهم مدة ألي ما جاء فيها حد نحكيو لبرى من المكتب على شوية سياسة وغير سياسة. عندهم تفكير واضح وينجمو يشدو معاك في الحديث النظري مغير ما يزلقو ياسر. الحديث دار على دور السلطة في تحقيق مصالح الأغلبية و من الشيرة لخرى إحترام مبادئ الأقلية. قال إلي مصالح الأغلبية لازمه تاخو الأولوية على مصالح الأقلية مش كما كان الأقلية (عايلة بن علي) تحتكر المصالح. قتلوا زادة إلي هذا ما لزمش يكون على حساب حرية الأقلية. قالي كي تبدا عندك الأغلبية تسكن في الشمال وأقلية في الشرق، ما يجيش تعمل كياس كبير يهز للشرق. لازم كياس كبير يهز للشمال وكياس تتوفر فيه مستلزمات التنقل الكريم يهز للشرق .. تي حصيلو، نقاش بناء لباس بيه ... حكيت معاه كما نحكي مع الي يعملو في العلوم السياسية من صحابي.
وفاة الإنتخابات وجاء وقت الفرز، صلى المراقب وواحد ناخب المغرب وبدينا عملية الفرز. حلين الصندوق بعد لا قيدنا المعطيات اللازمة و حضرنا المحاضر ألي بش نعمروهم، قلبنا الصندوق على طاولة وحطينا ال-151 ورقة على قفاها وبدينا. أنا مسيت الورقة لولا والمراقب م النهضة قالي سمي بسمله !! سميت بسبله، وبديت: خمسطاش، النهضة، خمسطاش، النهضة، خمسطاش، النهضة، خمسطاش، النهضة، خمسطاش، النهضة، عشرة، المؤتمر، خمسطاش، النهضة، عشرة، المؤتمر، خمسطاش، النهضة، ستة، التكتل، خمسطاش، النهضة، خمسطاش، النهضة، عشرة، المؤتمر، أثناش، القطب، أثناش، القطب خمسطاش، النهضة، خمسطاش، النهضة، خمسطاش، النهضة، خمسطاش، النهضة، عشرة، المؤتمر.... تي حصيلو فهمتوها، فما شكون سألني شكون جاب أكثر أصوات، قتلها ماك جيت وريت اللحي ..
قيدنا ما قيدنا، سكرنا الصندوق ومشينا تعشينة وعملنا شيشة في ميامي المناضلة.
حكاللنا صاحبنا على كفاش التوانسة في مايامي إلي يعرفهم م الجامع يعاون بعضهم ويخدموا بعضهم. يلموا فلوس بش يبنيو جوامع وعندهم زوز حاجات اخرين يركزوا عليهم لازم نعاود نسأل عليهم. قاللنا بدا يمشي مع واحد يعرفوا وبعد بطل. قالك برشة أمريكان يصليو على كراسي ويتكستيو (يبعثوا في ميساجات) وقتلي الناس الكل تصلي. هاذا خبر غير مؤكد و ما عليا كان البلاغ!


شكراً على المتابعة وكيما قال المذيع في موزاييك لبارح، جازاكم الله خيراً !